Лиам Росеньор истеъфога чиқарилгач, «Челси» янги бош мураббий изламоқда. Қайд этилишича, ҳозирча топ-даражадаги мутахассисларнинг ҳеч бири Лондонда ишлаш истаги билан ёнмаяпти.
Германия терма жамоасининг амалдаги бош мураббийи Юлиан Нагельсманн эҳтимолий номзодлар қаторида эди, бироқ The Times нашрининг хабар беришича, у АПЛга ўтишга қизиқиши йўқлигини аллақачон билдирган.
«Ҳеч қайси мураббий ёши каттароқ ва тажрибалироқ футболчиларни сотиб олиш имкониятисиз «Челси»да ишлашга рози бўлмайди», — деб таъкидлади манба.
Британия нашри бошқа вариантлар сифатида Мадриднинг «Реал» клубидан кетганидан бери ишсиз бўлган Хаби Алонсо, шунингдек, Андони Ираола ва Сеск Фабрегасларни тилга олмоқда. Ираола мавсум якунида «Борнмут»ни тарк этади, Фабрегас эса Италиянинг «Комо» жамоасини бошқармоқда.
