«Бавария»дан ижарага олинган «Тоттенхэм» ярим ҳимоячиси Жоау Палинья мавсум якунланганидан кейин Лондонда қолиши мумкин. Журналист Флориан Плеттенбергнинг хабар беришича, «шпорлар» португалиялик футболчининг ўйинидан мамнун ва уни тўлиқ сотиб олишга тайёр, бироқ бу фақат ўз шартлари асосида амалга ошишини истамоқда.

Агар «Бавария» дастлаб келишилгандек 25 миллион евро талаб қилишда давом этса, трансфер амалга ошмаслиги мумкин. Лондонликлар чегирмага эришиш учун музокаралар ўтказишни режалаштирмоқда. Мюнхенликлар эса Палиньяга асосий таркиб футболчиси сифатида қарашмаяпти, шу сабабли таклифларни кўриб чиқишга тайёр.

Жорий мавсумда 30 ёшли хавбек «Тоттенхэм» сафида барча мусобақаларда 40 та ўйинда майдонга тушиб, 5 та гол урди ва 3 та голли узатмани амалга оширди.