«Ливерпуль» ва Франция терма жамоаси ҳужумчиси Уго Экитике Лондонда операция қилинди. Бу ҳақда L’Equipe нашри хабар бермоқда.

Футболчи Чемпионлар лигаси доирасида «ПСЖ»га қарши кечган баҳсда ўнг оёғидаги ахилл пайини узиб олган ва натижада сафдан чиққан эди. Манбанинг маълум қилишича, жарроҳлик амалиёти 18 апрель куниёқ бўлиб ўтган. Унда «Ливерпуль» футболчилари билан ишлашда катта тажрибага эга бўлган шифокорлар иштирок этишди.

Франция нашрининг таъкидлашича, тиббий муолажа бир йил аввал худди шундай жароҳат олган NBA юлдузи, машҳур баскетболчи Жейсон Тейтумни операция қилган жарроҳ томонидан масофавий тарзда назорат қилиб турилган. Экитикенинг 2026-27 йилги мавсумнинг иккинчи ярмида майдонга қайтиши кутилмоқда. Жорий мавсумда у 45 та ўйинда майдонга тушиб, 17 та гол ва 6 та голли узатмани амалга оширишга улгурган эди.