«Манчестер Юнайтед» сардори Бруну Фернандеш бошқа жамоалардан таклифлар бўлишига қарамай, нега манкунианликлар таркибида қолишга қарор қилганини сўзлаб берди. Аввалроқ Саудиянинг «Ал-Ҳилол» клуби футболчига фаол қизиқиш билдирган эди.
«Мен клубга ҳали фойдам тегиши мумкин деб ҳисоблаганим учун қолдим. Албатта, Саудия билан боғлиқ бутун бошли воқеа, пуллар... Гап жуда катта пул ҳақида кетаётган эди. Оиламизнинг ўзига хос жиҳати борлиги яхши: рафиқам иккимиз анча оддий инсонлармиз. Дунёдаги энг бой одамларга айланишга интилмаслигимизни аниқ тушунамиз. Биз шунчаки орзуларимизни рўёбга чиқаришни, фарзандларимиз билан яхши ҳаёт кечиришни ва иложи борича муваффақиятга интилишни хоҳлаймиз.
Рафиқам менга: «Сен ўз орзуингга, шунчалик интилган нарсангга эришдингми?» қабилида гапирди. Айнан шу нарса менга фикрларимиз бир жойдан чиқаётганини англатди. Шунчаки ишлашда давом этиш керак, кейин эса вазият нима билан тугашини кўрамиз.
Мен клубни бундай қийин даврда тарк этишни истамадим. Премьер-лига ва Чемпионлар лигасида ғолиб чиқишни хоҳлайман, буни ҳеч қачон яширмаганман», — деди Фернандеш BBC’нинг The Wayne Rooney Show кўрсатувига берган интервьюсида.
