«Manchester Yunayted» sardori Brunu Fernandesh boshqa jamoalardan takliflar bo‘lishiga qaramay, nega mankunianliklar tarkibida qolishga qaror qilganini so‘zlab berdi. Avvalroq Saudiyaning «Al-Hilol» klubi futbolchiga faol qiziqish bildirgan edi.
«Men klubga hali foydam tegishi mumkin deb hisoblaganim uchun qoldim. Albatta, Saudiya bilan bog‘liq butun boshli voqea, pullar... Gap juda katta pul haqida ketayotgan edi. Oilamizning o‘ziga xos jihati borligi yaxshi: rafiqam ikkimiz ancha oddiy insonlarmiz. Dunyodagi eng boy odamlarga aylanishga intilmasligimizni aniq tushunamiz. Biz shunchaki orzularimizni ro‘yobga chiqarishni, farzandlarimiz bilan yaxshi hayot kechirishni va iloji boricha muvaffaqiyatga intilishni xohlaymiz.
Rafiqam menga: «Sen o‘z orzuingga, shunchalik intilgan narsangga erishdingmi?» qabilida gapirdi. Aynan shu narsa menga fikrlarimiz bir joydan chiqayotganini anglatdi. Shunchaki ishlashda davom etish kerak, keyin esa vaziyat nima bilan tugashini ko‘ramiz.
Men klubni bunday qiyin davrda tark etishni istamadim. Premyer-liga va Chempionlar ligasida g‘olib chiqishni xohlayman, buni hech qachon yashirmaganman», — dedi Fernandesh BBC’ning The Wayne Rooney Show ko‘rsatuviga bergan intervyusida.
