Туркия Суперлигасининг навбатдаги тури доирасида «Истанбул Башакшеҳир» ўз майдонида «Қосимпошо» жамоасини қабул қилиб, йирик 4:0 ҳисобда ғалаба қозонди.
Мазкур учрашувда Ўзбекистон миллий терма жамоаси сардори Элдор Шомуродов мезбонлар сафида асосий таркибда майдонга тушди ва тўлиқ 90 дақиқа ҳаракат қилди. Ҳамюртимиз баҳсда ўз ҳисобига иккита гол ёздириб қўйишга муваффақ бўлди. Эътиборли жиҳати, Шомуродов ўйиндаги биринчи ва сўнгги голларга муаллифлик қилиб, жамоасининг муваффақиятига муносиб ҳисса қўшди.
Учрашув якунларига кўра, футболчиларнинг ҳаракатларини таҳлил қилиб борувчи машҳур Sofascore нашри Элдор Шомуродовнинг ўйинини юқори баҳолади. Ҳужумчимизнинг кечаги баҳсдаги иштироки 8,6 баллга лойиқ кўрилди ва у майдоннинг энг яхши ўйинчиларидан бири сифатида эътироф этилди.
