Turkiya Superligasining navbatdagi turi doirasida «Istanbul Bashakshehir» o‘z maydonida «Qosimposho» jamoasini qabul qilib, yirik 4:0 hisobda g‘alaba qozondi.
Mazkur uchrashuvda O‘zbekiston milliy terma jamoasi sardori Eldor Shomurodov mezbonlar safida asosiy tarkibda maydonga tushdi va to‘liq 90 daqiqa harakat qildi. Hamyurtimiz bahsda o‘z hisobiga ikkita gol yozdirib qo‘yishga muvaffaq bo‘ldi. E’tiborli jihati, Shomurodov o‘yindagi birinchi va so‘nggi gollarga mualliflik qilib, jamoasining muvaffaqiyatiga munosib hissa qo‘shdi.
Uchrashuv yakunlariga ko‘ra, futbolchilarning harakatlarini tahlil qilib boruvchi mashhur Sofascore nashri Eldor Shomurodovning o‘yinini yuqori baholadi. Hujumchimizning kechagi bahsdagi ishtiroki 8,6 ballga loyiq ko‘rildi va u maydonning eng yaxshi o‘yinchilaridan biri sifatida e’tirof etildi.
