Лиссабоннинг «Спортинг» клуби чап қанот ҳимоячиси Максимилиано Араухо фаолиятини Англия Премьер-лигасида давом эттириши мумкин. Record нашрининг хабар беришича, 26 ёшли футболчининг хизматларига Лондоннинг «Арсенал» клуби жиддий қизиқиш билдирмоқда.
Маълумотларга кўра, «канонирлар» уругвайлик футболчининг трансфери бўйича Португалия клуби билан дастлабки алоқаларни ўрнатган.
Максимилиано Араухо 2024 йилда Мексиканинг «Толука» клубидан 13 миллион евро эвазига «Спортинг» сафига келиб қўшилган эди. Унинг лиссабонликлар билан амалдаги шартномаси 2029 йилнинг 30 июнига қадар мўлжалланган.
Жорий мавсумда уругвайлик ҳимоячи барча турнирларда 41 та учрашувда майдонга тушиб, ўз ҳисобига 6 та гол ва 4 та голли узатма ёздириб қўйди. Transfermarkt портали футболчининг бозор қийматини 25 миллион еврога баҳоламоқда.
