Мадриднинг «Реал» клуби ва Германия терма жамоаси собиқ ярим ҳимоячиси Тони Кроос «қироллик клуби»да иш бошлаши мумкин. Бу ҳақда журналист Рамон Альварес де Мун хабар берди.
Манбага кўра, «қаймоқранглилар» Юрген Клоппни жамоа бош мураббийи этиб тайинламоқчи. Кроос эса ўз ҳамюртининг мураббийлар штабидан жой олиши мумкин. Таъкидлаш жоизки, икки немис мутахассиси ўртасидаги муносабатлар жуда яхши.
Мадрид гранди жорий мавсумни Хаби Алонсо қўл остида бошлаган эди. Мавсум давомида «Реал» бошқарувда ўзгаришга қўл урди ва Альваро Арбелоани мураббий этиб тайинлади. Испания чемпионати турнир жадвалида Мадрид жамоаси иккинчи ўринни эгаллаб турибди. УЕФА Чемпионлар лигасидаги иштирокини эса «Реал» чорак финал босқичида якунлаган.
