Лондоннинг «Арсенал» клуби бош мураббийи Микель Артета вингер Букайо Саканинг жароҳатдан сўнг сафга қайтгани ҳақидаги саволга жавоб берди. 24 ёшли инглиз футболчиси 22 мартдан бери илк бор майдонга тушди — у Премьер-лиганинг шанба кунги «Ньюкасл»га қарши баҳси якунида захирадан ўйинга қўшилди.

«Ажойиб. У майдонда ўтказган дақиқалари ичида ўйинга ўз таъсирини ўтказишга улгурди. Букайо яхши ва тетик кўринмоқда. Унинг майдонда пайдо бўлиши жамоага алоҳида таъсир қилишини албатта сезасиз. Ҳозир бизга бу жуда зарур. У юкламаларни қандай қабул қилишини кузатамиз. Мавсумнинг энг муҳим палласи келди ва у жангга киришишга интилмоқда», — деди Артета матбуот анжуманида.

«Канонирлар» 9-дақиқада Эберечи Эзе томонидан киритилган гол эвазига «қарғалар» устидан минимал ҳисобда ғалаба қозонишди.