Миср терма жамоаси ҳужумчиси Муҳаммад Салоҳ ўзининг хайрлашув учрашувида қайси футбол юлдузига қарши тўп суришни исташи ҳақидаги саволга жавоб берди.
«Роналду, Месси ёки Неймар? Месси», — дея Салоҳнинг сўзларини машҳур инсайдер ва журналист Фабрицио Романо келтирмоқда.
Маълумот учун, Салоҳ ҳозирда 34 ёшда. Шу йилнинг 1 июль куни унинг «Ливерпуль» клуби билан тузган меҳнат шартномаси муддати тугади ва у эркин агентга айланди.
Аввалроқ Миср терма жамоаси Жаҳон чемпионати — 2026 мусобақасининг 1/16 финалида Австралия терма жамоасини мағлуб этиб, кейинги босқичга йўл олган эди. У ерда африкаликларга Аргентина терма жамоаси рақиблик қилади.
ЖЧ-2026 нимчорак финалидан ўрин олган Аргентина — Миср учрашуви сешанба куни, 7 июль куни бўлиб ўтади. Бош ҳакамнинг старт ҳуштаги Тошкент вақти билан соат 21:00 да чалинади.
