«Манчестер Сити» бош мураббийи Хосеп Гвардиола мавсумнинг ҳал қилувчи баҳсларида таркиб ротацияси зарурлиги ҳақида гапирди. Аввалроқ испаниялик мутахассис муваффақиятли натижалар туфайли асосий таркибга ўзгартириш киритишни тўхтатганини тан олган эди.

«Менга бутун жамоа керак, уларнинг ҳар бири керак. Ўйинлар сони бу қадар кўплигида таркибни ўзгартирмасликнинг иложи йўқ. Биз алмаштиришлардан оқилона фойдаланишимиз лозим ва ҳар бир футболчи ўсишга эришиши шарт. Мен ўйинчилардан кўпроғини талаб қиламан. Улардан тобора кўп ва яна кўпроқ натижа кутяпман», — дея Гвардиоланинг сўзларидан иқтибос келтирмоқда City Report.

Шанба куни «Манчестер Сити» «Саутгемптон»ни мағлуб этиб (2:1), Англия Кубоги финалига йўл олди. «Шаҳарликлар»нинг Премьер-лига доирасидаги навбатдаги учрашуви 4 май куни «Эвертон»га қарши бўлиб ўтади.