«Тоттенхэм» ярим ҳимоячиси Хави Симонс Премьер-лига доирасида «Вулверхэмптон»га қарши кечган сўнгги ўйинда оғир жароҳат олди. Нидерландиялик футболчи учрашувнинг 63-дақиқасида захирага олинган эди.

Журналист Фабрицио Романо хабар беришича, энг ёмон шубҳалар ўз тасдиғини топди: 23 ёшли футболчида олдинги хочсимон боғламлари узилиши аниқланди. У энди фақат 2027 йилда сафга қайта олади.

Хави Симонс ўтган йилнинг ёзида Германиянинг «РБ Лейпциг» клубидан «шпорлар» сафига келиб қўшилган эди. Англиядаги дебют мавсумида у «Тоттенхэм» учун 41 та ўйинда майдонга тушиб, 5 та гол ва 6 та голли узатмани амалга оширди. «Вулверхэмптон» билан баҳсда Роберто де Дзерби жамоаси сўнгги дақиқаларда киритилган гол эвазига ғалабани илиб кетди (1:0).