Ҳозирда ижара асосида «Барселона» шарафини ҳимоя қилаётган «Манчестер Юнайтед» вингери Маркус Рэшфорд «Тоттенхэм» қизиқишлари доирасига тушди. Бу ҳақда TEAMtalk нашри хабар бермоқда.

28 ёшли инглиз футболчисининг келажаги ҳозирча ноаниқ бўлиб қолмоқда. Футболчининг ўзи фаолиятини Каталонияда давом эттиришни истаса-да, «кўк-анорранглилар» футболчини сотиб олиш борасида «қизил иблислар» билан келишувга эриша олмаяпти.

Юзага келган вазиятдан Лондоннинг «Тоттенхэм» клуби унумли фойдаланиб қолмоқчи. Қайд этилишича, «шпорлар» агар Премьер-лигадаги ўрнини сақлаб қолса, ёзда таркибни жиддий кучайтиришни режалаштирган ва Рэшфорд уларнинг асосий мақсадларидан бирига айланган. Бироқ Лондон клуби учун футболчини ўз лойиҳасига ишонтириш анча қийин кечиши тахмин қилинмоқда.

Маълумот учун, Transfermarkt портали Маркус Рэшфорднинг бозор қийматини 40 миллион еврога баҳолаган.