«Милан» клуби ярим ҳимоячиси Лука Модрич Италия А Сериясининг 34-турида жиддий жароҳат олиб, сафдан чиқди.

А Сериянинг 34-тури доирасида кечган «Ювентус»га қарши баҳсда (0:0) 40 ёшли хавбек ҳаводаги тўп учун курашда Мануэль Локателли билан тўқнашиб кетди. Тиббий ёрдам кўрсатилганига қарамай, Модрич 80-дақиқада майдонни тарк этишга мажбур бўлди.

Хорватиянинг Sportske novosti портали ва инсайдер Фабрицио Романо берган маълумотларга кўра, футболчининг юз суяги икки жойидан синган. Шу сабабли Модрич учун мавсумнинг қолган қисми муддатидан аввал якунланди. Ҳозирда фахрий футболчининг жарроҳлик амалиётига муҳтожлиги масаласи кўриб чиқилмоқда.

Шундай бўлса-да, Лука Модрич ЖЧ-2026 турнирида Хорватия терма жамоасига ёрдам бериши кутилмоқда. Катта эҳтимол билан у жаҳон чемпионатида махсус ҳимоя ниқобида тўп суради.