Жаҳон чемпионатининг гуруҳ босқичи якунланганидан сўнг, шунингдек, чорак финаллардан кейин барча сариқ карточкалар бекор қилиниши режалаштирилмоқда. Бу ҳақда The Athletic хабар бермоқда.

Манбага кўра, бу ўзгариш плей-офф ўйинларини футболчиларнинг тўпланган огоҳлантиришлар сабаб ўтказиб юбориш эҳтимолини камайтириш учун жорий этилмоқда.

АҚШ, Канада ва Мексикада бўлиб ўтадиган турнирда тўпланган сариқ карточкалар учун дисквалификацияга оид янги қоидалар сешанба куни Ванкувер шаҳрида бўлиб ўтадиган ФИФА кенгаши йиғилишида муҳокама қилиниб, тасдиқланиши кутилмоқда.

Аввалги жаҳон чемпионатларида сариқ карточкалар фақат чорак финал босқичидан кейин “куярди”. Бироқ мусобақа иштирокчилари сони 32 тадан 48 тагача оширилгани сабабли, ФИФА дисквалификациялар сонини камайтириш мақсадида қоидаларни ўзгартиришни режалаштирмоқда.