«Манчестер Юнайтед» ҳужумчиси Беньямин Шешко АПЛ доирасида «Брентфорд» устидан қозонилган ғалабадан (2:1) сўнг ўз фикрлари билан ўртоқлашди. Душанба оқшомида «Олд Траффорд»да кечган баҳсда словениялик форвард жамоасининг иккинчи голига муаллифлик қилди.

«Ҳиссиётлар ажойиб. Ўйин қийин кечди, чунки бизга қарши анча мураккаб рақиб турганини билардик. Аммо биз ҳисобни сақлаб қолишга муваффақ бўлдик ва бу ғалабага лойиқ эдик. Голим ҳақида гапирсам, ўйиндан ўйинга ўзимни яхшироқ ҳис қиляпман. Жамоадошларим билан майдондаги ўзаро тушунишимиз ҳам тобора шаклланмоқда», — деди Шешко Sky Sports нашрига берган интервьюсида.

Ҳужумчи, шунингдек, жамоанинг Чемпионлар лигасига чиқиш имкониятларига ҳам тўхталиб ўтди: «Биз охирги дақиқагача курашишимиз керак. Бу вазифани уддалашимизга ишонаман».

Маълумот учун, «Манчестер Юнайтед» навбатдаги учрашувини 3 май куни ўз майдонида «Ливерпуль»га қарши ўтказади.