«Manchester Yunayted» hujumchisi Benyamin Sheshko APL doirasida «Brentford» ustidan qozonilgan g‘alabadan (2:1) so‘ng o‘z fikrlari bilan o‘rtoqlashdi. Dushanba oqshomida «Old Trafford»da kechgan bahsda sloveniyalik forvard jamoasining ikkinchi goliga mualliflik qildi.

«Hissiyotlar ajoyib. O‘yin qiyin kechdi, chunki bizga qarshi ancha murakkab raqib turganini bilardik. Ammo biz hisobni saqlab qolishga muvaffaq bo‘ldik va bu g‘alabaga loyiq edik. Golim haqida gapirsam, o‘yindan o‘yinga o‘zimni yaxshiroq his qilyapman. Jamoadoshlarim bilan maydondagi o‘zaro tushunishimiz ham tobora shakllanmoqda», — dedi Sheshko Sky Sports nashriga bergan intervyusida.

Hujumchi, shuningdek, jamoaning Chempionlar ligasiga chiqish imkoniyatlariga ham to‘xtalib o‘tdi: «Biz oxirgi daqiqagacha kurashishimiz kerak. Bu vazifani uddalashimizga ishonaman».

Ma’lumot uchun, «Manchester Yunayted» navbatdagi uchrashuvini 3 may kuni o‘z maydonida «Liverpul»ga qarshi o‘tkazadi.