Дортмунднинг «Боруссия» клуби собиқ футболчиси Жейдон Санчони ортга қайтариш бўйича музокараларда сезиларли илгарилади. Бу ҳақда TEAMtalk нашри хабар бермоқда.
Манбанинг таъкидлашича, томонлар келишувга эришишга жуда яқин туришибди, чунки шу ёзда 26 ёшли вингер эркин агентга айланади. Бироқ Санчо айни дамда ижара асосида тўп сураётган «Астон Вилла» клуби ҳам уни ўз сафида сақлаб қолишдан умидини узмаган. Бирмингемликлар футболчини кейинги мавсум учун ҳам жамоада қолдиришга ҳаракат қилмоқда.
Эслатиб ўтамиз, «Астон Вилла» Санчони ўтган йилнинг сентябрь ойида ижарага олган эди. Ўшандан бери у барча мусобақаларда 34 та ўйинда майдонга тушиб, битта гол ва учта голли узатмага муаллифлик қилди. Transfermarkt портали футболчининг трансфер нархини 20 миллион еврога баҳоламоқда.
