«ПСЖ» вингери Хвича Кварацхелия ўзининг жамоадоши Усмон Дембеле ҳақида илиқ фикрлар билдирди. 28 апрель куни уларнинг клуби УЕФА Чемпионлар лигаси биринчи ярим финалида «Бавария» билан тўқнаш келади.

«Усмон Дембеле билан бирга ўйнаш — ҳақиқий завқ, у менинг ишимни осонлаштиради. У майдонда ҳамма нарсани қила олади, айнан шунинг учун ҳам «Олтин тўп»ни қўлга киритди. Ҳужумчилар ва жамоанинг қолган аъзолари ўртасидаги муносабатлар шунчаки ажойиб. Машғулотга келганимизда ҳамманинг юзида табассум бўлади. Менимча, бу бизнинг яхши формада эканлигимизнинг сабабларидан биридир. Парижда эканлигимдан ва янги дўстлар орттирганимдан фахрланаман. Биз ҳозир худди бир оилага ўхшаймиз», — дея грузиялик футболчининг сўзларини келтиради клуб расмий сайти.

Усмон Дембеле 2023 йилдан бери «ПСЖ» шарафини ҳимоя қилиб келмоқда, у ўшанда «Барселона»дан 50 миллион евро эвазига кўчиб ўтган эди. Жорий мавсумда у 34 та учрашувда 16 та гол урди ва 9 та голли узатмани амалга оширди.