«PSJ» vingeri Xvicha Kvarasxeliya o‘zining jamoadoshi Usmon Dembele haqida iliq fikrlar bildirdi. 28 aprel kuni ularning klubi UEFA Chempionlar ligasi birinchi yarim finalida «Bavariya» bilan to‘qnash keladi.
«Usmon Dembele bilan birga o‘ynash — haqiqiy zavq, u mening ishimni osonlashtiradi. U maydonda hamma narsani qila oladi, aynan shuning uchun ham «Oltin to‘p»ni qo‘lga kiritdi. Hujumchilar va jamoaning qolgan a’zolari o‘rtasidagi munosabatlar shunchaki ajoyib. Mashg‘ulotga kelganimizda hammaning yuzida tabassum bo‘ladi. Menimcha, bu bizning yaxshi formada ekanligimizning sabablaridan biridir. Parijda ekanligimdan va yangi do‘stlar orttirganimdan faxrlanaman. Biz hozir xuddi bir oilaga o‘xshaymiz», — deya gruziyalik futbolchining so‘zlarini keltiradi klub rasmiy sayti.
Usmon Dembele 2023 yildan beri «PSJ» sharafini himoya qilib kelmoqda, u o‘shanda «Barselona»dan 50 million yevro evaziga ko‘chib o‘tgan edi. Joriy mavsumda u 34 ta uchrashuvda 16 ta gol urdi va 9 ta golli uzatmani amalga oshirdi.
