«Барселона» «Камп Ноу»даги реконструкция ишлари давом этаётгани сабабли уй учрашувларини ўтказишда муаммога дуч келди. Marca нашрининг хабар беришича, 2027 йилнинг ёзида, стадионга том ўрнатиш ишлари бошланганда, клуб яна бир неча ойга ўз майдонини тарк этишига тўғри келади.
«Барселона» раҳбарияти Олимпия стадионига қайтишни истамаяпти. Бунинг ўрнига клуб жамоанинг дубль таркиби ўйинларини ўтказадиган Йохан Кройф номидаги стадионни кенгайтириш вариантини кўриб чиқмоқда.
«Барселона» ушбу стадион сиғимини 16 минг томошабингача оширишни режалаштирган, бироқ маҳаллий ҳокимият бу режаларга қарши чиқмоқда. Маъмуриятнинг таъкидлашича, техник жиҳатдан стадион тахминан 10 минг ўринга мўлжалланган, унинг сиғимини 16 минггача етказиш эса транспорт тизимида жиддий муаммоларни келтириб чиқаради ва туманга ортиқча юклама бўлади.
Шу билан бирга, муниципалитет стадион сиғимини бироз оширишни (яна 4 мингта қўшимча ўрин) маъқуллашга тайёр. Бу Ла Лига талабларига жавоб бериш учун кифоя қилади, бироқ клубнинг асосий режаларини амалга ошириш учун етарли эмас.
