«Реал Мадрид» ҳимоячиси Эдер Милитао ижтимоий тармоқларда шифохона каравотида тушган суратини жойлаштирди. Суратда футболчининг ёнида унинг турмуш ўртоғини ҳам кўриш мумкин. Аввалроқ «Реал» Милитаонинг жарроҳлик амалиётини ўтказгани ҳақида эълон қилган эди.

«Мени биладиган ҳар бир киши ўз ишимга қанчалик содиқ эканлигимни ва энг яхши жисмоний ҳолатда бўлиш учун қанчалик кўп меҳнат қилганимни тушунади. Афсуски, «Реал» ва миллий терма жамоада ишонч билан ўйнашим учун ўз танам ҳақида қайғуришимга тўғри келмоқда», — дейилади Милитаонинг баёнотида.

Шунингдек, футболчи қўллаб-қувватловчи хабарлар учун барчага миннатдорчилик билдирди.

Аввалроқ матбуотда Эдер Милитаонинг тикланиши учун тахминан беш ой вақт керак бўлиши ҳақида ёзилган эди.