«Реал Мадрид» ва Бразилия терма жамоаси ҳужумчиси Родриго Гоэс сонидан жароҳат олиб, кузгача сафдан чиққан жамоадоши, «қаймоқранглилар» ва Бразилия миллий жамоаси ҳимоячиси Эдер Милитаони қўллаб-қувватлади. Ҳар икки футболчи аввалроқ жарроҳлик амалиётини ўтказган ва 2026 йилги жаҳон чемпионатини ўтказиб юборади.

«Доимо биргамиз», — деб ёзди Родриго ўзининг Х ижтимоий тармоғидаги саҳифасида ва постга Милитао билан терма жамоадаги биргаликдаги тушган суратини илова қилди.

Эслатиб ўтамиз, Родриго ўнг оёғидаги олдинги хочсимон бойламлари ва ташқи мениски йиртилиши туфайли муваффақиятли операция қилинган эди. Ҳужумчи Испания чемпионатининг 26-туридан ўрин олган «Хетафе»га қарши ўйинда (0:1) жароҳат олганди. Шуниси эътиборлики, ҳужумчи шикастланганига қарамай, ўйинни давом эттира олган. Родриго «Сантьяго Бернабеу» майдонига 55-дақиқада тушиб, учрашув якунигача тўп сурганди.

Милитао ҳам 2025 йил декабрь ойида олган жароҳати қайталангани сабабли операция қилинди. У 21 апрель куни Испания чемпионатининг 33-тури доирасидаги «Алавес»га қарши баҳсда (2:1) шикастланган эди.