«Real Madrid» va Braziliya terma jamoasi hujumchisi Rodrigo Goes sonidan jarohat olib, kuzgacha safdan chiqqan jamoadoshi, «qaymoqranglilar» va Braziliya milliy jamoasi himoyachisi Eder Militaoni qo‘llab-quvvatladi. Har ikki futbolchi avvalroq jarrohlik amaliyotini o‘tkazgan va 2026 yilgi jahon chempionatini o‘tkazib yuboradi.
«Doimo birgamiz», — deb yozdi Rodrigo o‘zining X ijtimoiy tarmog‘idagi sahifasida va postga Militao bilan terma jamoadagi birgalikdagi tushgan suratini ilova qildi.
Eslatib o‘tamiz, Rodrigo o‘ng oyog‘idagi oldingi xochsimon boylamlari va tashqi meniski yirtilishi tufayli muvaffaqiyatli operasiya qilingan edi. Hujumchi Ispaniya chempionatining 26-turidan o‘rin olgan «Xetafe»ga qarshi o‘yinda (0:1) jarohat olgandi. Shunisi e’tiborliki, hujumchi shikastlanganiga qaramay, o‘yinni davom ettira olgan. Rodrigo «Santyago Bernabeu» maydoniga 55-daqiqada tushib, uchrashuv yakunigacha to‘p surgandi.
Militao ham 2025 yil dekabr oyida olgan jarohati qaytalangani sababli operasiya qilindi. U 21 aprel kuni Ispaniya chempionatining 33-turi doirasidagi «Alaves»ga qarshi bahsda (2:1) shikastlangan edi.
