Англия терма жамоаси ва «Ливерпуль» клуби собиқ сардори Стивен Жеррард Чемпионлар лигаси ярим финали доирасидаги «Атлетико» ва «Арсенал» (1:1) учрашувидаги ҳакамлик борасида ўз фикрларини билдирди.
Жеррард иккинчи бўлимда Мадрид клуби дарвозасига белгиланган, бироқ кейинчалик бекор қилинган пенальти вазиятига тўхталди. Унинг фикрича, бош ҳакам видеотакрорлардан сўнг ўз қарорини ўзгартириши учун етарлича асослар мавжуд бўлмаган.
«Ҳакамлар жасорат кўрсатиши ва ўзларининг дастлабки қарорида собит туришлари керак эди. Бу вазиятда ҳакам томонидан яққол ва очиқ-ойдин хатога йўл қўйилмаганди ва буни ҳамма тушуниб турибди. Аммо Диего Симеоненинг майдон четидаги хатти-ҳаракатлари ва босими ҳакамни ўз қарорига шубҳа билан қарашга мажбур қилди», — дея Жеррарднинг сўзларини келтирмоқда TNT Sports.
