Африка футбол конфедерациясига (CAF) аъзо бўлган ассоциациялар 2027 йилда бўлиб ўтадиган Халқаро футбол федерацияси (ФИФА) президентлиги сайловларида Жанни Инфантино номзодини бир овоздан қўллаб-қувватлашди.
Ушбу қарор ФИФАнинг 76-конгресси арафасида Ванкуверда ўтказилган CAF аъзоларининг учрашувида қабул қилинди.
«CAF аъзо-ассоциациялари Жанни Инфантинонинг 2027–2031 йиллар даври учун ФИФА президентлиги лавозимига қайта сайланишини бир овоздан қўллаб-қувватлашга келишиб олдилар», — дейилади CAF расмий сайтидаги баёнотда.
Африка футбол конфедерациясига 54 та миллий футбол ассоциацияси аъзо ҳисобланади.
Маълумот учун, Инфантино 2016 йилдан бери ФИФА президенти лавозимида ишлаб келмоқда ва шу пайтгача икки бор ушбу лавозимга қайта сайланган.
