Мураббий Маурисио Почеттино "Тоттенхэм"да бирга ишлаган "Бавария" ҳужумчиси Ҳарри Кейн ҳақида ўз хотиралари билан ўртоқлашди. Почеттино Лондон клубини 2014 йилдан 2019 йилгача бошқарган, Кейн эса "шпорлар"нинг асосий жамоасида 2011 йилдан 2023 йилга қадар тўп тепган.

"Тим Шервуд клубни тарк этиб, мен келган пайтимда, адашмасам, Кейн учинчи ёки тўртинчи ҳужумчи эди. Ҳарри билан ишлашни бошлаганимизда, ундаги кучли ирода ва муваффақиятга бўлган интилишни кўрдик. Тўғри, ўша пайтда унинг одатлари (турмуш тарзи) энг яхши ҳолатда эмас эди, лекин биз билан гаплашиб олгач, у оқилона йўл тутди ва ҳамма нарсани тезда ўзгартирди — машғулотларга ёндашув, овқатланиш тартиби ва ҳоказо. У ва унинг атрофидаги инсонлар Ҳаррининг муваффақиятга эришишини таъминладилар", — дея Почеттинонинг сўзларини келтирмоқда Goal.com.

Жорий мавсумда 31 ёшли ҳужумчи клуб миқёсида барча мусобақаларда 46 та ўйинда майдонга тушиб, 54 та гол урди ва 7 та голли узатмага муаллифлик қилди.