АҚШ терма жамоаси бош мураббийи Маурисио Почеттино Диего Марадона ва Лионел Мессини ўзаро қиёслади.

«Буни солиштириш мен учун адолатдан эмас. Чунки менинг Марадона билан ҳиссий боғлиқлигим бор. Месси билан эса ҳеч қачон бундай бўлмаган. Ёшлик чоғимда ўз кумирим ва қаҳрамонимни кўрганимда, ўртада ўзига хос ҳиссий ришта пайдо бўлган. Месси билан учрашганимда эса ёшим 50 дан ошган эди. Бу ёшда инсон воқеаларга бошқача нигоҳ билан қарайди. Албатта, мен учун уларнинг иккаласи ҳам тарихдаги энг яхши 5 нафар футболчи қаторига киради. Уларни ўзаро қиёслаш имконсиз. Месси қилаётган ишлар ҳайратланарли, худди ўз вақтида Марадона қилган ишлар каби», — деди Почеттино Гарри Невиллнинг «Stick to Football» подкастида.

Эслатиб ўтамиз, Аргентина терма жамоаси Месси билан 2022 йилда, Марадона билан эса 1986 йилда жаҳон чемпиони бўлган.