Италиянинг «Комо» клуби бош мураббийи Франсеск Фабрегас «ПСЖ» ва «Бавария» ўртасидаги ярим финал учрашувини томоша қилганидан сўнг ўз ҳайратини яшира олмади. 28 апрель куни бўлиб ўтган ва Луис Энрике шогирдларининг 5:4 ҳисобидаги ғалабаси билан якунланган ўйин мутахассисда катта таассурот қолдирди.

«Агар сиз ушбу икки жамоадан бирининг мураббийи бўлсангиз, эҳтимол, бироз азият чекишингизга тўғри келарди, лекин томошабин сифатида келганингизда… Бундай ўйинни кўраман деб тасаввур ҳам қилмагандим. Ҳаётимдаги энг яхши ўйин», — дея Фабрегаснинг сўзларидан иқтибос келтирмоқда Il Mio Napoli.

Фабрегас, шунингдек, ушбу баҳс замонавий футбол қайси йўналишда кетаётганини яққол кўрсатиб берганини таъкидлади.

«Мен жамоавий тактикани деярли кузатмадим, лекин индивидуал маҳоратни кўрдим. Прессинг, яккама-якка курашлар. Ушбу учрашувдан ўзим учун кўплаб сабоқлар олдим».

Яна бир ярим финал баҳсида «Атлетико» ва «Арсенал» жамоалари муроса кўчасини танлашди — 1:1. Жавоб ўйинлари 5-6 май кунлари бўлиб ўтади.