Бразилиянинг Рио-де-Жанейро шаҳрида дзюдо бўйича катталар ўртасида ўтказилаётган 28 – жаҳон чемпионатида бугун эркаклар ўртасида 81 кг. вазнда, аёллар ўртасида эса 63 кг. вазн тоифасида беллашувлар ўтказилади.

Эркаклар ўртасида бўлиб ўтадиган мусобақада ҳамюртимиз Яҳё Имомов ҳам ғолиблик учун татамида бел олишади. Эътиборлиси, дунёнинг етакчи полвонларидан бири ҳисобланган Яҳё баҳсларга иккинчи босқичдан киришади. Ушбу босқичда юртдошимиз Робин Пасек (Швеция) / Свейнбёрн Иура (Исландия) беллашуви ғолиби билан кураш олиб боради.

Аввал хабар қилганимиздек, дунёнинг 123 давлати вакиллари иштирокида ўтказилаётган жаҳон чемпионатида 9 нафар дзюдочиларимиз баҳсларга киришадилар. Бугунги кунга келиб 60, 66, 73 кг. вазн тоифаларида мусобақалар ниҳоясига етиб, ғолиб ва совриндорлар номи маълум бўлган. Афсуски, ушбу вазн тоифаларида совринли ўринларга сазовор бўлган спортчилар орасидан ҳамюртларимиз жой олишмади.

Яҳё Имомовдан ташқари, Эркин Дониёров (-90 кг, 30 август), Соиб Қурбонов (-100 кг, 31 август) ва Рамзиддин Саидов (-100 кг, 31 август) ҳам энди баҳсларга киришадилар.

Жаҳон чемпионати баҳслари 1 сентябрга қадар давом этади. Мусобақанинг сўнгги куни жамоавий баҳслар ўтказилади.