«Барселона» вингери Рафинья Диас агар Карло Анчелотти Неймарни бўлажак Жаҳон чемпионати қайдномасига киритса, бундан жуда хурсанд бўлишини билдирди. «Сантос»нинг 34 ёшли футболчиси 2023 йилдан бери миллий жамоада ўйнамаётган бўлса-да, ЖЧ-2026 га бориш умидида эканини бир неча бор таъкидлаган.
«Мен учун Неймар — Бразилияга олтинчи Жаҳон чемпионлигини ютишда ёрдам бера оладиган ягона инсон. Унинг Бразилия футболи учун нақадар муҳим шахс эканини тушуниш керак. Ўз вақтида у мени терма жамоада гўёки умрбод танишдек кутиб олганди. Унинг ёрдами билан мен ўзимга бўлган ишончни топдим ва ўз футболимни ўйнай бошладим», — дея Рафиньянинг сўзларини келтирмоқда Brasil Football.
Эслатиб ўтамиз, бразилияликлар 2002 йилдан бери Жаҳон чемпиони бўла олишмаяпти, бироқ ҳамон қўлга киритилган кубоклар сони бўйича рекордни ўзларида сақлаб туришибди.
