«Barselona» vingeri Rafinya Dias agar Karlo Anchelotti Neymarni bo‘lajak Jahon chempionati qaydnomasiga kiritsa, bundan juda xursand bo‘lishini bildirdi. «Santos»ning 34 yoshli futbolchisi 2023 yildan beri milliy jamoada o‘ynamayotgan bo‘lsa-da, JCH-2026 ga borish umidida ekanini bir necha bor ta’kidlagan.
«Men uchun Neymar — Braziliyaga oltinchi Jahon chempionligini yutishda yordam bera oladigan yagona inson. Uning Braziliya futboli uchun naqadar muhim shaxs ekanini tushunish kerak. O‘z vaqtida u meni terma jamoada go‘yoki umrbod tanishdek kutib olgandi. Uning yordami bilan men o‘zimga bo‘lgan ishonchni topdim va o‘z futbolimni o‘ynay boshladim», — deya Rafinyaning so‘zlarini keltirmoqda Brasil Football.
Eslatib o‘tamiz, braziliyaliklar 2002 yildan beri Jahon chempioni bo‘la olishmayapti, biroq hamon qo‘lga kiritilgan kuboklar soni bo‘yicha rekordni o‘zlarida saqlab turishibdi.
