«Вильярреал» ўз тарихида илк бор кетма-кет икки мавсум Чемпионлар лигасида иштирок этадиган бўлди.

Марселино Гарсия Тораль шогирдлари Ла Лиганинг 34-турида ўз майдонида «Леванте»ни тор-мор келтирди (5:1). Айни дамда «сариқ сув ости кемаси» турнир жадвалида учинчи ўринни эгаллаб турибди ва бешинчи ўриндаги «Бетис»ни 18 очкога ортда қолдирмоқда.

Кастельон вилояти жамоаси жорий мавсумда ЕЧЛнинг умумий босқичида қатнашди, бироқ 8 ўйинда бор-йўғи бир очко жамғариб, жадвалда 35-ўринни эгаллади ва плей-оффга чиқа олмади.

Бунгача «Вильярреал» тўрт марта Чемпионлар лигасида иштирок этган. Жамоа 2005/06 йилги мавсумда ярим финалгача етиб борган (клуб тарихидаги энг яхши натижа), 2008/09 йилги мавсумда чорак финалда тўхтаган, 2011/12 йилги мавсумда гуруҳдан чиқа олмаган ва 2021/22 йилги мавсумда яна 1/2 финалга қадар етиб борган эди.