Жерар Мартин «Барселона»даги ҳайратланарли сериясини давом эттирди. 24 ёшли футболчи Ла Лиганинг шанба кунги баҳсида «Осасуна» устидан қозонилган ғалабада (2:1) жамоасига ёрдам берди ва ўйинни тўлиқ ўтказди.
Barca Universal нашрининг қайд этишича, Мартин марказий ҳимоячи сифатида асосий таркибда майдонга тушган жорий мавсумдаги 26 та ўйиннинг 25 тасида «кўк-анорранглилар» ғалаба қозонишган. Чемпионат доирасида эса футболчи мукаммал кўрсаткичга эга — у асосий таркибда тушган 17 та ўйиннинг барчасида (17/17) жамоа зафар қучган.
Жорий якшанба куниёқ «Барселона» муддатидан олдин Ла Лига ғолибига айланиши мумкин. Бунинг учун Мадриднинг «Реал» клуби сафарда «Эспаньол»га қарши кечадиган баҳсда очко йўқотиши кифоя.
