Мадриднинг «Реал» клуби ҳужумчиси Винисиус Жуниор Ла Лиганинг навбатдаги тури доирасида «Барселона»га қарши кечадиган баҳс олдидан ўз кутилмалари билан ўртоқлашди. Якшанба куни Альваро Арбелоа шогирдлари «Эспаньол»ни мағлуб этди (2:0) ва «кўк-анорранглилар»нинг «Эл-Класико»гача муддатидан олдин чемпионликни қўлга киритишига йўл қўймади.

Шундай бўлса-да, Каталония грандининг якуний чемпионлиги муқаррар бўлиб кўринмоқда: мавсум тугашига тўрт тур қолганда «Барса» Мадрид клубидан 11 очко олдинда бормоқда. «Камп Ноу»даги тўқнашувда меҳмонларнинг ғалабасидан бошқа ҳар қандай натижа «Барселона»ни расман чемпионга айлантиради.

«Бизда бир ҳафта вақт бор — бугунгидек ўйин кўрсатиш учун энг яхши тарзда тайёргарлик кўришимиз керак. Биз бундай учрашувларни яхши кўрамиз. Умид қиламанки, баҳсга ажойиб спорт формасида етиб борамиз ва ғалаба қозона оламиз», — деди Винисиус ўз интервьюсида.

«Барселона» — «Реал» учрашуви 10 май куни бўлиб ўтади. Ўйин Тошкент вақти билан соат 00:00 да бошланиши режалаштирилган.