Миланнинг «Интер» клуби бош мураббийи Кристиан Киву жамоа билан меҳнат шартномасини узайтиради. Бу ҳақда машҳур инсайдер Николо Скира хабар бермоқда.

Манба берган маълумотларга кўра, шартномани узайтириш жараёни якуний босқичда турибди. Ҳозирда сўнгги деталлар муҳокама қилинмоқда, ҳужжатларни имзолаш эса мавсум якунида режалаштирилган. Янги келишув 2028 йилгача мўлжалланган бўлиб, уни яна бир мавсумга узайтириш имконияти ҳам кўзда тутилади. Қайд этилишича, Кивунинг йиллик маоши 4 миллион еврони ташкил қилади, бунга қўшимча равишда турли бонуслар ҳам қўшиб берилади.

Эслатиб ўтамиз, Киву ўтган ёзда «Интер» бошқарувини қўлга олган эди. Аввалроқ Милан клуби «Парма»ни мағлуб этиб (2:0), муддатидан олдин Италия чемпионига айланди. Шунингдек, 13 май куни Киву шогирдлари Италия Кубоги финалида «Лацио» билан тўқнаш келишади ва «олтин дубль»ни қайд этишлари мумкин.