23 ёшли франциялик вингер Брэдли Барколья «ПСЖ»ни тарк этиши мумкин. Бу ҳақда журналист Экрем Конур хабар бермоқда.

Манбанинг маълумотига кўра, «ПСЖ» ҳали ҳам Баркольяни жамоанинг муҳим қисми деб ҳисоблайди, бироқ Европа грандлари футболчини диққат билан кузатиб бормоқда. Томонлар ҳозирча шартномани узайтириш борасида келиша олишмаяпти, шу сабабли унинг сотиб юборилиши истисно этилмайди.

Таъкидланишича, Баркольяга «Реал», «Барселона», «Атлетико», Дортмунднинг «Боруссия»си ва «Бавария» клублари қизиқиш билдирмоқда. Агар манбага ишонилса, «ПСЖ» ўз футболчиси учун 70–80 миллион евро талаб қилмоқда.

Жорий мавсумда Барколья барча мусобақаларни ҳисобга олганда 44 та ўйинда майдонга тушиб, 12 та гол урди ва 7 та голли узатмани амалга оширди.