«Тоттенхэм» клуби собиқ посбони Уго Льорис собиқ жамоадоши Ҳарри Кейннинг фаолияти ва инсоний фазилатлари ҳақида фикр билдирди.

Франциялик дарвозабоннинг сўзларига кўра, Кейн ўз устида тинимсиз ишлаши билан бошқалардан ажралиб туради.

«Ҳеч ким ундан бундай юқори натижаларни кутмаган эди. Кейн — меҳнаткаш инсон. Унинг дарвоза олдидаги маҳорати тасодиф эмас, балки темир интизом ва меҳнат маҳсулидир», — дейди Льорис.

Шунингдек, Льорис ҳужумчининг йиллар давомида ўйин услуби ўзгарганини таъкидлади. Кейн фаолияти давомида нафақат соф «тўққизлик», балки майдон марказида ўйинни бошқарадиган плеймейкер даражасигача кўтарилганини алоҳида қайд этди.

«У оддий қадриятларга эга, оилапарвар йигит. У жамоа ичида кўп гапирмаса-да, лекин етакчилик қобилияти юқори. Ҳарри юлдузликка интилмайди, бу унинг характерига хос эмас. У кўпроқ джентльмен. Балки у рок-юлдуз эмасдир, лекин ҳақиқий юлдуз», — дея қўшимча қилди Льорис.