«Реал» ярим ҳимоячиси Орельен Тчуамени фаолиятини Англияда давом эттириши мумкин. Fichajes нашри берган маълумотларга кўра, «Манчестер Сити» француз футболчисини ўз сафига қўшиб олишга қизиқиш билдирмоқда.

«Шаҳарликлар» 26 ёшли футболчининг трансфери учун 90 миллион евро тўлашга тайёр. «Манчестер Сити» бош мураббийи Хосеп Гвардиола Тчуаменини тактик жиҳатдан идеал ўйинчи деб ҳисобламоқда. Гарчи «Реал» ярим ҳимоячини юқори баҳоласа-да, бундай йирик таклиф «қаймоқранглилар»ни ўз хавбекини сотиш ҳақида ўйлаб кўришга мажбур қилиши мумкин.

Орельен Тчуамени 2022 йилда «Монако»дан «Реал»га 80 миллион евро эвазига ўтган эди. Унинг амалдаги шартномаси 2028 йилнинг 30 июнига қадар мўлжалланган. Жорий мавсумда ярим ҳимоячи Мадрид клуби сафида барча мусобақаларда 46 та ўйинда майдонга тушиб, иккита гол урди ва иккита голли узатмани амалга оширди.