«Атлетико» Мадрид бош мураббийи Диего Симеоне Чемпионлар лигаси ярим финал жавоб учрашувининг якунида «Арсенал» спорт директори Андреа Берта билан тортишиб қолди. Arsenal Radar нашрининг хабар беришича, аргентиналик мутахассис майдон четида италиялик функционерга қўпол тарзда нималарнидир уқтирган, сўнгра унга яқинлашиб, итариб юборган.
Тўқнашув УЕФА расмий вакиллари томонидан тўхтатилди. Кўп ўтмай финал ҳуштаги чалинди ва у «канонирлар»нинг 1:0 ҳисобидаги ғалабасини (икки ўйин натижасига кўра 2:1) қайд этди.
Эслатиб ўтамиз, Андреа Берта «Арсенал»га ўтишдан аввал узоқ йиллар давомида «Атлетико»да фаолият юритган ва 2013 йилдан 2025 йилгача техник ҳамда спорт директори лавозимларини эгаллаган. Диего Симеоне эса ўз постида 2011 йил охиридан бери ишлаб келмоқда.
