«Atletiko» Madrid bosh murabbiyi Diyego Simeone Chempionlar ligasi yarim final javob uchrashuvining yakunida «Arsenal» sport direktori Andrea Berta bilan tortishib qoldi. Arsenal Radar nashrining xabar berishicha, argentinalik mutaxassis maydon chetida italiyalik funksionerga qo‘pol tarzda nimalarnidir uqtirgan, so‘ngra unga yaqinlashib, itarib yuborgan.
To‘qnashuv UEFA rasmiy vakillari tomonidan to‘xtatildi. Ko‘p o‘tmay final hushtagi chalindi va u «kanonirlar»ning 1:0 hisobidagi g‘alabasini (ikki o‘yin natijasiga ko‘ra 2:1) qayd etdi.
Eslatib o‘tamiz, Andrea Berta «Arsenal»ga o‘tishdan avval uzoq yillar davomida «Atletiko»da faoliyat yuritgan va 2013 yildan 2025 yilgacha texnik hamda sport direktori lavozimlarini egallagan. Diyego Simeone esa o‘z postida 2011 yil oxiridan beri ishlab kelmoqda.
