Якшанба куни Премьер-лига доирасидаги «Манчестер Юнайтед» ва «Ливерпуль» ўйини бошланишидан бироз олдин шифохонага ётқизилган Алекс Фергюсонга уйига жавоб берилди. TalkSPORT нашрининг хабарига кўра, 84 ёшли шотландиялик мутахассис ўзини яхши ҳис қилмоқда ва шифохонадан чиқарилган.
Сэр Алекс Фергюсон «Манчестер Юнайтед» афсонаси ҳисобланади — у жамоани 1986 йилдан 2013 йилгача бошқарган. Шотландиялик мураббий қўл остида «қизил иблислар» 13 марта Англия чемпиони, икки марта Чемпионлар лигаси ғолиби бўлишган ва бошқа кўплаб совринларни қўлга киритишган.
«Манчестер Юнайтед» сўнгги бор 2013 йилда Премьер-лига чемпионлигини қўлга киритган, шундан сўнг Фергюсон истеъфога чиққан эди.
