Бугун Туриннинг "Ювентус" клубидан "Милан"га ўтгани расман эълон қилинган 29 ёшли ҳужумчи Алессандро Матри "россонерлар" сафида тўққизинчи рақам остида тўп сурадиган бўлди.
Ўйинчининг шартномаси 2017 йил 30 июлига қадар тузилган. Норасмий маълумотларга кзра, унинг маошига йилига 2,6 миллион еврони ташкил этади.
Трансфер суммаси эса 11 миллион евро бўлиб, бу маблағни миланликлар келгуси тўрт йил давомида тўлаб борадилар. Шунингдек, яна бир миллион миқдорида бонуслар ҳам кўзда тутилган.
"Милан"га қайтганимдан хурсандман. Ўн йил олдин бу жамоани тарк этганимдан сўнг кўп тажриба тўпладим. Ўзим ўсган клубга қайтиш - бу жуда ажойиб туйғу.
Нега 9-рақамни танладим? Веа ва Инзагиларнинг ўйинларини кўриб шу рақам остида тўп суришни аввалдан орзу қилардим", деджи Матри.
Қайд этиш ўринлики, Алессандро "Милан" ёшлар жамоаси таркибида 1996 йили - 12 ёшлигидан тўп сурган.













