«Барселона» ярим ҳимоячиси Гави Мадриднинг «Реал» клубига қарши ўйин олдидан жамоадаги кайфият ҳақида гапириб берди. Ла Лига чемпионлигини муддатидан олдин қўлга киритиш учун «кўк-анорранглилар»га дуранг ҳам кифоя қилади, бироқ испаниялик хавбекнинг сўзларига кўра, жамоа учун ғалаба қозониш жуда муҳим.

«Эл-Класико» олдидан кучли ҳаяжон ва босим сезилади. Жамоамизда «Ла Масия»нинг кўплаб тарбияланувчилари бор, улар барча даражаларда «Реал»га қарши сон-саноқсиз ўйинларда иштирок этишган. Бу принципиал баҳс ва биз уни интиқлик билан кутяпмиз. Уларни мағлуб этиб, чемпионликни нақд қилишга сабрсизлик билан интиляпмиз. Вазифамиз — 100 очко тўплаш. Бу тарихий воқеа бўлади», — дея «Barca Universal» Гавининг сўзларини келтирди.

«Барселона» учун уй учрашуви ҳисобланган «Реал»га қарши баҳс якшанба куни бўлиб ўтади ва Тошкент вақти билан соат 00:00 да (Душанбага ўтар кечаси) бошланади.