«Астон Вилла» бош мураббийи Унаи Эмери Европа Лигаси ярим финали доирасидаги «Ноттингем Форест»га қарши жавоб ўйини олдидан ўз фикрлари билан ўртоқлашди. Эслатиб ўтамиз, дастлабки баҳсда «Ноттингем» 1:0 ҳисобида ғалаба қозонган эди.
«Бизда ҳозирги ва келажакдаги мақсадларимиз учун янги вазифалар қўйиш имконияти бўлади. Бугунги ўйин биз учун ёки кимдир учун охирги имконият эканини ўйламайман. Футболчилар, албатта, биз босиб ўтаётган жараёндан завқ олишмоқда. Улар футболдаги қийинчиликларни англаб туришибди, лекин «Астон Вилла»да охирги уч йил давомида бошдан кечираётган буюк лаҳзаларимизни ҳисобга олсак, биз табассум қилишимиз ва ҳаммасидан фахрланишимиз мумкин.
Бироқ, биз ҳамон ўзимизга нисбатан жуда талабчанмиз ва қилаётган ишларимизда изчилликни сақлаб қоламиз. Бу (натижа) бизнинг фикрлашимизга, жараёнимизга ва ривожланиш йўлимизга ҳеч қандай путур етказмайди», — деди Эмери матбуот анжуманида.
