«Ноттингем Форест» сардори Морган Гиббс-Уайт фаолиятида илк бор Англия чемпионатининг ойнинг энг яхши футболчиси совринини қўлга киритди. Бу ҳақда мусобақа ташкилотчиларининг расмий сайти хабар бермоқда.
Гиббс-Уайт апрель ойида тўртта гол ва битта голли узатмани ўз ҳисобига ёздириб қўйди. Унинг самарали ҳаракатлари сирасига «Бёрнли»га қарши ўйинда (4:1) 15 дақиқа ичида қайд этилган хет-трик, шунингдек, «Сандерленд» билан баҳсдаги (5:0) гол ва голли узатма киради.
Ушбу натижалар, «Астон Вилла» билан қайд этилган дуранг (1:1) билан бир қаторда, «ўрмончилар»га хавфли ҳудуддан (қуйи лигага тушиб кетиш зонаси) узоқлашишга ёрдам берди.
Гиббс-Уайт «Ноттингем Форест» тарихида «Ойнинг энг яхши футболчиси» совринини қўлга киритган иккинчи ўйинчига айланди. Биринчи бўлиб бу натижага 2024 йилнинг октябрь ойида Крис Вуд эришган эди.
