Лондоннинг «Арсенал» клуби бош мураббийи Микель Артета АПЛ 36-тури доирасидаги «Вест Хэм»га қарши ўйин олдидан матбуот анжуманида иштирок этди. Учрашув 10 май куни бўлиб ўтади.
Артета ўз нутқини таркибдаги янгиликлардан бошлади. Унинг сўзларига кўра, Микель Мерино ва Юрриен Тимбернинг дербида иштирок этиш имконияти йўқ.
«Улар мавсум якунигача ҳеч бўлмаса бир неча дақиқа ўйнашлари учун ҳали анча меҳнат қилишлари керак.
Биз Чемпионлар лигаси ярим финали ўйинидан сўнг дарҳол гаплашиб олдик. Бу ажойиб лаҳза ва биз бунга лойиқ эдик. Финалга тайёргарлик кўриш учун вақтимиз бор, лекин ҳозир бор энергия ва эътибор «Вест Хэм»га қаратилиши керак, биз буни аниқ тушунтирдик».
Эртага биз якшанба кунги жангга жисмоний ва руҳий жиҳатдан энг яхши ҳолатда тайёр бўлиш учун қўлимиздан келган барча ишни қилишимиз керак», — деди мураббий.
«Арсенал» 76 очко билан АПЛда пешқадамлик қилмоқда. «Манчестер Сити» ҳисобида 71 очко ва битта захира ўйини бор. «Вест Хэм» эса 36 очко билан 17-ўринда бормоқда ва лигада жон сақлаб қолиш учун курашяпти.
