«Тоттенхэм» ҳимоячиси Педро Порро келаётган ёзги трансфер ойнасида Испания чемпионатига қайтишни режалаштирмоқда. El Gol Digital нашрининг хабар беришича, 26 ёшли футболчи фаолиятини яна ватанида давом эттириш истагида.

Ҳозирда футболчига асосий даъвогарлар сифатида «Барселона» ва Мадриднинг «Реал» клублари тилга олинмоқда. Хусусан, «кўк-анорранглилар» бош мураббийи Ханси Флик тизими учун Порронинг ҳужумкорлик хусусиятлари мос келади деб ҳисобланмоқда.

Лондон клуби ўз етакчисини осонликча қўйиб юбормоқчи эмас. «Шпорлар» билан 2028 йилгача шартномага эга бўлган ҳимоячининг трансфер баҳоси 60-65 миллион евро этиб белгиланган. Шунингдек, футболчига «Манчестер Сити» ва «Бавария» каби грандлар ҳам қизиқиш билдирмоқда.

Маълумот учун, Педро Порро жорий мавсумда «Тоттенхэм» сафида 43 та ўйинда майдонга тушиб, 3 та гол ва 5 та голли узатмага муаллифлик қилди. У илгари Испанияда «Жирона» ва «Вальядолид» шарафини ҳимоя қилган.