«Tottenxem» himoyachisi Pedro Porro kelayotgan yozgi transfer oynasida Ispaniya chempionatiga qaytishni rejalashtirmoqda. El Gol Digital nashrining xabar berishicha, 26 yoshli futbolchi faoliyatini yana vatanida davom ettirish istagida.

Hozirda futbolchiga asosiy da’vogarlar sifatida «Barselona» va Madridning «Real» klublari tilga olinmoqda. Xususan, «ko‘k-anorranglilar» bosh murabbiyi Xansi Flik tizimi uchun Porroning hujumkorlik xususiyatlari mos keladi deb hisoblanmoqda.

London klubi o‘z yetakchisini osonlikcha qo‘yib yubormoqchi emas. «Shporlar» bilan 2028 yilgacha shartnomaga ega bo‘lgan himoyachining transfer bahosi 60-65 million yevro etib belgilangan. Shuningdek, futbolchiga «Manchester Siti» va «Bavariya» kabi grandlar ham qiziqish bildirmoqda.

Ma’lumot uchun, Pedro Porro joriy mavsumda «Tottenxem» safida 43 ta o‘yinda maydonga tushib, 3 ta gol va 5 ta golli uzatmaga mualliflik qildi. U ilgari Ispaniyada «Jirona» va «Valyadolid» sharafini himoya qilgan.